–
«O próximo mércores 17 de maio celebraremos o Día das Letras Galegas e eu, desde que souben quen ía ser o protagonista, agardaba a chegada da data con moito entusiasmo. Sei que xa non vivirei a ledicia de renderlles tributo ás que considero pilastras fundamentais da cultura galega —como Álvaro Cunqueiro, o artista; Ramón Otero Pedrayo, o erudito; e Vicente Risco, a personaxe—, mais neste 2023 a celebración é ben especial, polo exemplo que supón o homenaxeado nesta particular teima que persigo desde hai anos.
Fernández del Riego, líder nos grandes proxectos culturais da posguerra —editorial Galaxia, revista Grial e Fundación Penzol—, para min foi, por riba de todo, un enorme divulgador de temáticas relacionadas con Galicia. E digo enorme divulgador porque nel conflúen as habilidades necesarias para se achegar ás xentes —sinxeleza, rigor, beleza e convicción— valéndose dunha gran variedade de medios —libros, artigo xornalísticos, gravacións, etc.—. E se eu creei a páxina web mariaberini.es foi cun soño, que non era outro que falar do noso patrimonio dunha maneira que contaxiase interese en coñecelo, como paso previo a amalo profundamente. Ilusión quizais inxenua, non si? Mais como dixo o gran fabulador de Mondoñedo «Na aspereza da vida cotiá, soñar é necesario, e perder o tesouro dos ensoños é perder o meirande dos tesouros do mundo», nun discurso de ingreso na Real Academia Galega no que precisamente Fernández del Riego, gran amigo da infancia, fíxolle a réplica.
Primeiro é necesario compromiso, despois concienciudo estudo e finalmente un exercicio de presentación, sincero e entusiasta, que pense en todas e cada unha das persoas. E do exemplo de Fernández del Riego aprendemos todos os que desexamos continuar ese labor que aínda necesita de moitas mans.
Feliz Día das Letras Galegas!»
MARÍA BERINI PITA DA VEIGA
–
–
–
–
«Comezabamos daquela, paseniña, penosamente, os esforzos da posible reconstrución (…). Que días inesquecibles, de ilusión e de anguria, pasados naquel mundo dos nosos soños!»
FRANCISCO FERNÁNDEZ DEL RIEGO. «Xeración Galaxia»
–
–
–
–
mariaberini.es 